HATIMAE SAMATTA AFIKISHA IDADI HII YA MECHI NDANI YA MWAKA 1 TOKA ALIPOJIUNGA NA GENK

Nahodha wa Tanzania, Mbwana Samatta, amefikisha jumla ya mechi 50 kwenye klabu yake ya Genk ya Ubelgiji. Samatta alifikisha idadi hiyo ya michezo kwenye mechi ya usiku wa kuamkia jana wakati Genk ikipambana na KSV Roeselare ugenini na kufanikiwa kupata ushindi wa bao 1-0.

Bao pekee la Genk lilifungwa na mshambuliaji kutoka Hispania, Jose Naranjo dakika ya 84 ikiwa ni dakika tatu tangu alipoingia uwanjani kuchukua nafasi ya Leandro Trossard.

Samatta amefunga mabao sita katika michezo sita aliyocheza hivi karibuni na kuwa mmoja wa washambuliaji wa kuogopwa Ubelgiji. Kwa sasa Samatta amefikisha mwaka mmoja tangu alipojiunga na timu hiyo akitokea TP Mazembe ya Jamhuri ya Kidemokrasia ya Kongo.

Katika idadi hiyo ya michezo 50 aliyocheza, mechi 18 alicheza msimu uliopita na 32 msimu huu na kufanikiwa kufunga jumla ya mabao 18. Genk inajiandaa kupambana na Celta Vigo kwenye mchezo wa Ligi ya Europa hatua ya nane bora Alhamisi wiki hii.