Kala Jeremah adai Harmorapa amekuwa maarufu kuliko hata baadhi ya wasanii wa hip hop wenye albamu 2

Harmorapa

Msanii wa muziki wa hip hop Kala Jeremiah amedai kwa tafiti ndogo aliyoifanya amegundua jina la rapper Harmorapa ni kubwa kuliko hata majina ya baadhi ya wasanii wa muziki huo ambao tayari wana albamu mbili sokoni.

Akiongea na Bongo5 Jumatano hii, Kala amedai muziki wa sasa umebadilika kutokana na mashabiki kutaka vitu fulani ambavyo sio vya kawaida.

“Mimi hivi karibuni nilikuwa na msichana mmoja nikitaka kujua nguvu za baadhi ya wasanii wa hip hop, nikawa namuuliza kuhusu wasanii wa hip hop, huwezi amini katika wasanii watano ambao wengine wana albamu mbili sokoni alisema hawajui, lakini nilivyomuuliza unamjua Harmorapa, mara moja akanijibu huyo namjua sana, tena ana wimbo mmoja,” alisema Kala.

Aliongeza,“Kwahiyo nikagundua huu muziki sasa hivi msanii anatakiwa kuzungumziwa kila mara, sio ukitoa tu ngoma basi, kuna namna mbavyo unaweza kufanya ili uendelee kuwa midomoni mwa mashabiki. Mimi siwezi kufanya hivyo kwa sababu tayari nimeshazeeka, nina mtoto kwahiyo kuna vitu fulani ambavyo nitaachana nayo,”

Rapper huyo ambaye ni baba wa mtoto mmoja aitwae Alama, bado anafanya vizuri na wimbo wake Mwanandoto.